පීසා ඩෝ එක සාදාගන්නා ආකාරය
අවශ්‍ය ද්‍රව්‍ය
- පාන්පිටි කෝප්ප 2
- මද උණුසුම් වතුර කෝප්ප 1/2
- සීනි තේ හැඳි 1
- යීස්ට් තේ හැඳි 1
- ඔලිව්තෙල් මේස හැඳි 2
- ලුණු තේ හැඳි 1
සාදාගන්නා ආකාරය
බෝල් එකකට උණුවතුර ටික දමා එයට සීනි සහ යීස්ට් එකතු කර හොඳින් කලවම් කර විනාඩි 5 ක් පිපෙන්නට හරින්න. එයට පාන්පිටි, ඔලිව්තෙල් හා ලුණු දමා අතේ නොඇලෙන පදමට මෘදු ලෙස ඩෝ එකක් හදාගන්න. එය පිටි ඉසගත් ලෑල්ලක් මත තබා අත්ලෙන් තමන්ගෙ පැත්තට විරුද්ධ පැත්තට තල්ලු කරමින් අනාගන්න. ඩෝ එක හොඳටම සොෆ්ට් වෙනකම් විනාඩි 15-20 ක් නීඩ් කරගෙන වටේට පිටි ටිකක් ඉස ලන්ච් ශීට් එකකින් වසා පැය 2 ක් පිපෙන්නට හරින්න.
පැය 2 කට පසු හොඳට ඩෝ එක නීඩ් කරලා හුළං ගතිය ඉවත් කර කොටස් දෙකකට වෙන්කර පෙර පරිදි නීඩ් කරගන්න. එය නැවත පිටි ඉසින ලද තැටියකට දමා රවුමට තුනී කර වටේ ගණකම ඇති වන සේ පීසා එක හදාගන්න. ටොපින් හා සෝස් එකතු කිරීමට පෙර ගෑරැප්පුවෙන් ඇන සිදුරු සදාගන්න
තන්දූරි චිකන් පීසා සාදාගන්නා ආකාරය
අවශ්‍ය ද්‍රව්‍ය
- කුඩාවට කපාගත් කටු රහිත චිකන් ග්‍රෑම් 500
- ඔලිව්තෙල් ස්වල්පයක්
- ඉඟුරු, සුදුලූනු පේස්ට් තේ හැඳි 1
- මිරිස්කුඩු තේ හැඳි 1
- කහකුඩු තේ හැඳි 1
- කොත්තමල්ලි කුඩු තේ හැඳි 1
- තන්දූරි පේස්ට් මේස හැඳි 3
සාදාගන්නා ආකාරය
පෑන් එකට ඔලිව්තෙල් ස්වල්පයක් එකතුකර රත්වනවිට ඉඟුරු, සුදුලූනු පේස්ට් එක දමා තෙම්පරාදු කරගන්න. මද වේලාවකින් චිකන් එකතුකර හොඳින් ෆ්‍රයි කරගෙන මිරිස්කුඩු, කහකුඩු හා කොත්තමල්ලි කුඩු එකතු කරන්න. රස අනුව ලුණුද එක් කරගන්න.
චිකන් වල වතුර ගතිය මතුවීගෙන එනවිට හොඳින් කලවම් කර තන්දූරි පේස්ට් එක එකතුකර කලවම් කර විනාඩි 8 කින් ඉවතට ගන්න. තුනීකරගත් පීසා ඩෝ එකට පීසා සෝස් තවරා මොසරැල්ලා චීස් අතුරා සෙල්සියස් අංශක 200 ට ප්‍රීහීට් කරගත් අවන් එකක විනාඩි 5 ක් බේක් කරගන්න. අවන් එකෙන් එළියට ගෙන සාදාගත් මිශ්‍රණය දමා විනාඩි 15 ක් බේක් කරගෙන නැවත එළියට ගෙන උඩින් මොසරැල්ලා චීස් අතුරා නැවතත් විනාඩි 5 ක් බේක් කරගන්න.
