ලොව උසම කඳු මුදුන වන මීටර් 8849 ක් උස එවරස්ට් කන්ද තරණය කළ ප්‍රථම ශ්‍රී ලාංකික කඳු නැගීමේ ශූරිය වන ජයන්ති කුරුඋතුම්පාල ලොව තවත් ප්‍රකට කඳු මුදුනක් වන ස්විස්ටර්ලන්ත – ඉතාලි සීමාවේ ඇති මැටහෝන් කන්ද තරණය කිරීම සඳහා අගෝස්තු 28 වැනිදා දිවයිනෙන් පිටත්ව යෑමට නියමිතය. මීටර් 4478 ක් උසැති මැටහෝන් කඳු මුදුන එවරස්ට් කන්දට වඩා අභියෝගාත්මක කඳු තරණයක් වන බවත් මෙහිදී පාෂාණමය හා අයිස් මතින් දැඩි බෑවුමක් තරණය කිරීමට සිදුවීම දැවැන්ත අභියෝගයක් වනු ඇති බව ද ඊයේ (22 දා) කොළඹ දී මාධ්‍ය හමුවකට එක්වූ ජයන්ති කුරුතුම්පාල පැවැසුවාය.
කඳු නැගීම ඇතුළු විශේෂයෙන්ම ශ්‍රී ලාංකික කාන්තාවන් හා ගැහැනු දරුවන් මුහුණ දෙන සමාජ අභියෝග ජය ගැනීම සඳහා මෙම කඳු තරණය ‘ක්ලයිම්බ් ලයික් අ ගර්ල්’ ලෙස තමා විසින් නම් කරන ලද බවද, තමන්ගේ මෙම අභියෝගාත්මක කාර්යය වෙනුවෙන් ආයතන රැසක් අනුග්‍රාහක දායකත්වය ලබාදෙන බවද ඇය වැඩිදුරටත් පැවසුවාය. මැටහෝන් කඳු මුදුන ජය ගැනීමෙන් අනතුරුව ජයන්ති කුරුඋතුම්පාල සැප්තැම්බර් 15 වැනිදා නැවත ශ්‍රී ලංකාවට පැමිණීමට නියමිතව ඇත.
– ජගත් කණහැරආරච්චි
