මොරිටේනියාවේ පිරිමින්ගේ ආදරය
අධික තරබාරුව සෞඛ්‍ය සම්පන්න ජීවිතයක් ගත කිරීමට බාධාවක් බැව් අපි දන්නවා. ඒ නිසාම අපි ආහාර පිළිබඳව යම් යම් සීමාවන් පනවා ගැනීම සිදු වෙනවා. නමුත් බටහිර අප්‍රිකානු රාජ්‍යක් වන මොරිටේනියාවේ කාන්තාවන් සහ ගැහැණු දරුවන් විසින් අනුගමනය කරන එක්තරා ආකාරයක චාරිත්‍රයක් තිබෙනවා. ගෝත්‍රික ජනතාවක් වන ඔවුන්ගේ විශ්වාසයට අනුව තරබාරුව කියන්නේ ධනවත් බවේ සංකේතයක්. ඒ නිසා මේ ජනතාව විසින් තමන්ගේ ගැහැණු දරුවන්ට බාල කාලයේ පටන්ම අධිපෝෂණයක් ලබා දෙනවා.
ඒ නිසා පවුලක් තුළදී ගැහැණු දරුවාගේ ආහාර ගැනත් වැඩි සැලකිල්ලක් දක්වනවා. ඔවුන්ට අවශ්‍ය වන්නේ ගැහැණු දරුවා ඉතා පෘෂ්ටිමත් ස්වරූපයකින් තබා ගැනීමටයි. මේ කටයුත්ත මව්පියන්ගේ වගකීමක් විදිහට සැලකෙන නිසා දරුවන් පුංචි කාලයේ පටන්ම අධි පෝෂණය ආරම්භ කරනවා. ඒ නිසා වයස අවුරුදු හයක දැරියන් වෙනුවෙන් එක් දිනකට බටර් කෝප්ප දෙකක් සහ මිශ්‍ර කරන ලද කුරක්කන් කිලෝ දෙකක් ලබා දෙනවා. ඊටත් අමතරව ඔටු කිරි ලීටර් 20 ක්ද මේ ආහාර පංගුවකට ඇතුළත් වෙනවා. නමුත් සෑම ගැහැණු දරුවෙක්ම මේ ආහාර රටාව වෙනුවෙන් කැමැත්තක් දක්වන්නේ නැහැ. ඒකකාකාරව ආහාර ගැනීම කාට වුනත් අප්‍රියයි. ඒ වුණත් ඔවුන්ට අකමැති වෙලත් බැහැ. මව්පියන් විසින් බලහත්කාරයෙන් හෝ මේ ආහාරය ලබා දෙනවා.
විවාහයට බලපානවා
මොරිටේනියාවේ ගෝත්‍රික ජනතාව තුළ විවාහයේදී මේ තරබාරුව ප්‍රධාන නිර්ණායකයක් ලෙසින් සලකනු ලබනවා. පිරිමින් ආකර්ශනය වෙන්නේ තරබාරු සිරුරක් ඇති කාන්තාවන්ට නිසා එය ඔවුන් ලත් සුදුසුකමක් ලෙසින් සලකනවා. ඒ නිසා තරබාරුව විවිධාකාර රෝගාබාධයන්ට හේතුවක් යැයි අවවාදය මොරිටේනියානුවන්ට ගැළපෙන්නේ නැහැ. මේ නිසා එරට කාන්තාවන්ගෙන් 50% ක් පමණ පිරිසක් තරබාරුවෙන් පසුවෙනවා.
(බී.බී.සී ඇසුරෙන්)
පුන්‍යා චාන්දනී ද සිල්වා
