දහ වැනි ශ්‍රේණියේ ඉගෙනුම ලැබූ 15 හැවිරිදි සිය දියණියට බරපතළ ලිංගික අපචාර කළ බවට වරදකරු වූ පියෙකුට බරපතළ වැඩ සහිත වසර 10 බැගින් වසර 20ක සිර දඬුවමක් ද ඊට අමතරව රුපියල් 40,000 ක දඩ මුදලක් සහ අතවරයට ලක්වූ දියණියට රුපියල් ලක්ෂයක වන්දි මුදලක් ද ගෙවන ලෙස බලපිටිය මහාධිකරණ විනිසුරු රංග දිසානායක මහතා ඊයේ (8 දා) නියම කළේය.
මෙසේ දඬුවම් ලැබුවේ පිටිගල පොලිස් වසමට අයත් පොරවගම අයෙකි. 2013 වසරේ ජනවාරි මස පළමු වැනිදා සිට 31 වැනිදා දක්වා කාලය තුළදී කීප වතාවක්ම මෙම දැරිය අතවරයට ලක් වී තිබෙනුයේ මව විදේශගත වී සිටියදී පියාගේ රැකවරණය යටතේ සිටියදීය. අතවරයට ලක් වන දින උදේ මෙම දැරිය පෙර දින රාත්‍රියේ පිසින ලද පිළුණු වූ පරිප්පු ආහාරයට ගෙන ඇති අතර මේ නිසා සවස වමනය කර ඇත. බීමත්ව සිටි පියාට මේ බව පවසද්දි එය පිළිනොගෙන කිසියම් අයෙකුගෙන් අතවරයක් වෙන්නට ඇතැයි කියා පරික්ෂා කර ගැනීමට යැයි කියමින් බරපතළ ලිංගික අතවර කර තිබේ.
කිහිප වතාවක්ම මෙසේ අතවරයට ලක් වෙද්දී අසල්වැසි ඥාතියෙකුට පැවසීමෙන් පසු පිටිගල පොලිසියට පැමිණිලි කර තිබේ. පිටිගල පොලිසියේ කාන්තා පොලිස් සැරයන් ප්‍රියංගනී (5780) මහත්මිය මේ ගැන විමර්ශනය කර අධිකරණය හමුවේ චෝදනා ගොනු කොට තිබිණි.
ඒ අනුව වැරදිකරු වූ පියාට එක් චෝදනාවකට වසර 10 බැගින් වසර 20ක සිර දඬුවම් නියම කෙරිණි. ඊට අමතරව රුපියල් විසි දහස බැගින් රුපියල් 40,000 ක දඩ මුදලක් ගෙවන ලෙසත් එය නොගෙවන්නේ නම් මාස 6 බැගින් ලිහිල් සිර දඬුවම් දෙකක් ද නියම කළේය. එයට අමතරව අතවරයට ලක්වූ අයට රුපියල් ලක්ෂයක වන්දි මුදලක් ගෙවන ලෙසත් එය නොගෙවන්නේ නම් තවත් මාස හයක ලිහිල් සිර දඬුවමක්ද මහාධිකරණ විනිසුරුවරයා නියම කළේය. පැමිණිල්ල වෙනුවෙන් රජයේ නීතිඥ සෞම්‍යා විජේසිංහ මෙනවිය පෙනී සිටියාය.
අනුර යසමිත්
