චමරි අතපත්තු… ශ්‍රී ලංකා කාන්තා ක්‍රිකට් වංශ කතාවේ රන් සීනුව ඇයයි. කාන්තා ආසියානු කුසලාන විස්සයි විස්ස තරගාවලියක වාර්තා වූ ප්‍රථම ශතකයේ හිමිකාරිනියයි, ශ්‍රී ලංකාවේ ජාත්‍යන්තර විස්සයි විස්ස තරගාවලියක වාර්තා වූ ශතක තුනක හිමිකාරිනියත් වන ඇය වර්තමාන පරපුරට තමන්ගේ වගකීම මොකක්ද, තමන්ගේ වගවීම මොකක්ද, යමක් වෙනුවෙන් කැපවීම යනු මොකද්ද, නායකත්වය මොකක්ද යන්න පෙන්වන ජීවමාන සාධකය ලෙස නොපැකිලව අපට හඳුන්වාදිය හැකිය.
චමරි මෙලෙස ඔසවා තැබුවේ ශ්‍රී ලංකා කාන්තා ක්‍රිකට් අභිමානය පමණක් නොව පුරා වසරක පමණ කාලයක සිට සේදී ගිය ශ්‍රී ලංකා ක්‍රිකට් කණ්ඩායමේ පසු බැසීම නිසා ඔද්දල් වූ සමස්ත ශ්‍රී ලංකා ක්‍රිකට් ප්‍රේක්ෂකයන්ගේ බලාපොරොත්තුවය. එපමණක් නොව කොවිඩ් වසංගතයත්, අහිතකර ආර්ථික ප්‍රතිපත්තිත් නිසා ලෝකයා ඉදිරියේ ගැරහුමට, අනුකම්පාවට, සමච්චලයට ලක් වූ ලක් මවගේ කීර්තිනාමයය. මේ නිසා චමරි ගැන මේ මොහොතේ අප රටක් වශයෙන් කතාකළ යුතුව ඇත.
ඇය එකපාරටම අද ඉන්න තත්ත්වයට පැමිණයේ නැත. ඇගේ කණ්ඩායමද එලෙස එක රැයින් ඔසවා තැබුවේද නැත. පැරදෙමින්, වැටෙමින්, නැවතත් නැගිටිමින්, දිනමින් ශ්‍රී ලංකා කාන්තා ක්‍රිකට් අද තිබෙන තත්ත්වයට ඔසවා තබන්නට ඇගේ කැපවීමත් කණ්ඩායම මෙහෙයවීමත් අතිශය වැදගත් වූ බව ඔවුන් දෙස බලා සිටි ඕනෑම ශ්‍රී ලංකිකයෙකුට පෙනී යනු ඇත.
කාන්තා ක්‍රිකට් ආසියානු කුසලානය මෙරට පැවැත්වෙන අතරවාරයේදී ඔවුන්ට ලැබෙන ගෙවීම් ගැන බුකියේ අවධානය යොමු වී ඇති සමයක අපද කිය සිටින්නේ පැරදි පැරදී කිසිත් නොවුණා ගානට සංචාරයේ පමණක් යෙදෙන මෙරට ජාත්‍යන්තර ක්‍රිකට් ක්‍රීඩකයෙකුට ගෙවන කෝටි ගණන් මුදල්වලින් සැලකිය යුතු ප්‍රමාණයක් හෝ ක්‍රිකට් ක්‍රීඩිකාවන්ටත් ලැබිය යුතු බවය.
අද වනවිට ජාත්‍යන්තරයේ ප්‍රබල කාන්තා ක්‍රිකට් කණ්ඩායමක් වන ඉන්දියාවේ ක්‍රිකට් ක්‍රීඩිකාවන්ට ලැබෙන මුදල එහි ක්‍රිකට් ක්‍රීඩකයන්ට ලැබෙන මුදලට සමාන කර තිබේයැයි පුවත් වාර්තා වන අතර වර්තමාන ශ්‍රී ලංකා කාන්තා ක්‍රිකට් කණ්ඩායම ධෘෂ ශ්‍රේණිගත කිරීම් අනුව එක් ස්ථානයක් පහළින් සිටින්නේ ඉන්දියාවට පමණය. එම නිසා ලංකාවේ ක්‍රිකට් කොල්ලන්ට තරග දිනනවාට වඩා සෙල්ලක්කාර ජීවිතයක් ගතකිරීම වෙනුවෙන් ගෙවන මුදලට සාපේක්ෂව ක්‍රිකට් කෙල්ලන්ගේ ගෙවීමද වැඩි විය යුතු බවට කිසිඳු තර්කයක් අපට නැත.
අසල්වැසි රාජ්‍යයේ ප්‍රබල ක්‍රිකට් ක්‍රීඩිකාවන්ට වඩා මොරාල් එකකින් මේ රට ඔසවා තැබීම වෙනුවෙන් වැඩ කරන චමරි ඇතුළු ජ්‍යෙෂ්ඨ සහ කණිෂ්ඨ ක්‍රීඩිකාවන්ගෙන් සැදුණු කාන්තා ක්‍රිකට් කණ්ඩායම දිරිමත් කිරීමේ වගකීම කාන්තා ක්‍රිකට් පරිපාලනයට වගකියන අය මෙන්ම සමස්ත රටවැසියාටම තිබෙන්නේ මෙකී ජයග්‍රහණ මගින්ද කියැවෙන්නේ රට පෙරට වන නිසාය.
