දශක හතරකට අධික කාලයක් පුරා ශ්‍රී ලංකා ක්‍රිකට් කණ්ඩායම දිරි ගන්වමින් ලොව පුරා ක්‍රිකට් ලෝලීන් අතර ‘පර්සි අංකල්’ ලෙසින් විරුදාවලි ලැබ ගෞරවාදරයට පාත්‍රව සිටි පර්සි අබේසේකර මහතා සිය ජීවන ඉනිම ඊයේ (30) නිම කරමින් අප අතරින් සමුගෙන ගියේය. බටහිර ඉන්දීය කොදෙව් දේශයේ දී 1979 වසරේ පැවති ලෝක කුසලාන තරගාවලියේ සිට සිය දෑතට ගත් ජාතික ධජය සමග ලෝ වටා යමින් ශ්‍රී ලංකා කණ්ඩායම දිරි ගැන්වීමේ යෙදුන ඒ සොඳුරු මිනිසා ගතේ සවිය ඇතිතාක් ශ්‍රී ලංකා ක්‍රිකට් කණ්ඩායමේ සෙවනැල්ල හා බැඳුනේය. රට වෙනුවෙන් ජයකොඩි නැංවූ ඒ මහතා ඊයේ සිය දෙනෙත් පියා ගන්නා විට ජීවන ගමනේ 87 වන කඩුල්ල පසු කර තිබුණි. පසුගිය කාලයේ රෝගාතුරව සිටි අබේසේකර මහතා රාගම රෝහලේදී අභාවප්‍රාප්ත වූ අතර දේහය පිළිබඳ අවසන් කටයුතු පසුව දැනුම් දීමට නියමිත බව පවුලේ ආරංචි මාර්ග සඳහන් කරයි.
