මෙලෝනි දසනායක-Miss Universe Sri Lanka 2024

ලංකාවට ක්‍රීඩාවෙන් නව නිපැයුම්වලින් ජාත්‍යන්තරය දිනලා කීර්තිය ගේන පදක්කම්ලාභීන් ගොඩක් ඉන්නවා. ඒ වගේම ලෝකෙට ලංකාව ගැන කියල කීර්තියක් ගේන්න බලන් ඉන්න සුන්දර තරුණියක් තමයි මෙලෝනි කියන්නේ. මේ අවුරුද්දේ ලංකාව වෙනුවෙන් මිස් යුනිවර්සස් තරගාවලිය නියෝජනය කරන්නේ ඇය.

මෙලෝනි ඔයාගෙ විස්තර ටිකක් කියන්නකෝ?

මම මෙලෝනි දසනායක. මට වයස අවුරුදු 25 යි. මම ව්‍යාපාරික පරිපාලන ක්ෂේත්‍රයේ උපාධිදාරිනියක්. දැනට ජාත්‍යන්තර බැංකුවක වැඩකටයුතු කරන ගමන් පාට් ටයිම් ටීවි හොස්ට් කෙනෙක් විදියටත් කටයුතු කරනවා. ඒ වගේම මම බාස්කට් බොල් ප්ලේයර් කෙනෙක්.

පොඩි කාලේ ඉදන් නිරූපණ ක්ෂේත්‍රයට කැමතිද?

ඔව්. ඒ ආසාව නිසාමයි නිරූපණ ක්ෂේත්‍රයට ආවේ. මිස් යුනිවර්සස් යන එක පොඩි කාලෙ ඉදන් තිබ්බ ඩී්‍රම් එකක්. මිස් යුනිවසස් කියන්නේ ලෝකේ තියෙන දැවැන්තම තරගාවලියක්. ඒක නිරූපණ ක්ෂේත්‍රයට එන්න ලොකු අඩිතාලමක්. ඒ නිසාම තමයි මිස් යුනිවර්සස් තරගයට සහභාගී වුණේ. අවුරුදු හයක ලොකු බ්‍රේක් එකකින් පස්සෙ තමයි ලංකාවේ මේ පැජන්ට් එක තිබ්බේ.

කොහොමද මේ ගමන ආවේ?

මිස් යුනිවර්සස් කියන්නේ මගේ පළවෙනි පැජන්ට් එක නෙවෙයි. මම මීට කලින් කීපසැරයක් පැජන්ට්වලට ගිහින් තියෙනවා. ඒ අත්දැකීම් මට හයියක් වුණා. ඒ වගේම ක්ෂේත්‍රයේ ප්‍රවීණයන්ගේ උදව් ලැබුණා. ඒ නිසා තමයි මට මිස් යුනිවර්සස් තරගාවලියට එන්න පුළුවන් වුණේ.

මොනවද මෙලෝනිට ලැබුණ ජයග්‍රහණ?

මිස් යුනිවර්සස් ෆයිනල් එක තිබුණේ වස්කඩුව සිට්‍රස් හොටෙල් එකේ. ඒ පැජන්ට් එකෙන් බෙස්ට් කැට්වෝර්ක්, මෝස්ට් එලිගන්ට් ඉන් ඊවිනිව් ඩ්‍රස් කියන මිනි ටයිටල් දෙක මට හම්බුණා. ඒ ටයිටල්ස් දෙකම ලබාගන්න පුළුවන් වීම ලොකු ජයග්‍රහණයක්.

ආපු බාධක මොනවද?

ලොකු කැපකිරීමක් කරා මේ ගමන එන්න. මම බාස්කට් බෝල් ප්ලේයර් කෙනෙක්. ඒ නිසා නිතරම පුහුණුවීම් කරන්න වෙනවා. ඒ වගෙම ඔෆිස් එකෙත් වැඩකරන නිසා කාලය කියන්නේ මට ගොඩක් වටින දෙයක්. ටයිම් එක බැලන්ස් කරන එක ටිකක් අමාරු වුණත් හරි විදියට ඒ දේවල් මැනේජ් කරපු නිසා මේ ගමන එන්න පුළුවන් වුණා.

ලැබුණ සහයෝගය ගැන කතා කළොත්…

මගේ අම්මයි තාත්තයි මල්ලියි මට උදව් කළා. ඒ වගේම මගේ යාළුවෝ මම වැඩ කරන බෑන්ක් එකේ අයගෙනුත් ලොකු සහයෝගයක් ලැබුණා. පුහුණුවීම්වලට අවශ්‍ය නිවාඩු පවා ගන්න බැන්ක් එකේ අය උදව් කළා. ඒ වගේම මිස් යුනිවර්සස් තරගාවලියට පුහුණුවීම් කරන්න ක්ෂේත්‍රයේ ප්‍රවීණයන්ගෙන් උපකාර ලැබුණා. ඒ නිසයි මේ ගමන ආවේ.

මෙලෝනිගේ  අනාගත බලාපොරොත්තු මොනවද?

දැනට මගේ ලොකුම බලාපොරොත්තුව තමයි ශ්‍රී ලංකාව නියෝජනය කරලා රටට කීර්තියක් ගේන එක. අවුරුදු හයකින් පස්සෙ තමයි මේ තරගාවලිය පැවැත්වෙන්නේ. ඒ නිසා ඒ වෙනුවෙන් කැප වෙන එක තමයි මගේ අරමුණ.

පවනි දිලේකා ✍️