ජයන්ත වික්‍රමතුංග කියන්නෙ ඕස්ට්‍රේලියාවේ ඉඳන් ඇවිත් පහුගිය දවසක ලංකාවෙදි තමන්ගෙ අත්තම්මා ගැන සින්දුවක් රිලීස් කරපු කෙනෙක්. විටින් විට විවිධ කලා කටයුතුවලට තමන්ගෙ දායකත්වය ලබා දෙන ඔහුගේ නවතම ගීතය වන ‘මිත්තණිය’ මේ වෙද්දි ඔබට රසවිඳින්න පුළුවන්. මේ ඔහු ඒ ගැන අප සමඟ කළ කතාබහකි.
සිවිල් ඉංජිනේරුවරයෙක්…
මම ජීවත් වෙන්නෙ ඕස්ට්‍රේලියාවේ බ්‍රිස්බේන්වල. සිවිල් ඉංජිනේරුවරයෙක් විදිහට සේවය කරනවා.
මේක මගේ අත්තම්මට ලියපු සින්දුවක්…
මම ඉපදුණේ මිරිස්සෙ. මගේ තාත්තා හිටපු විදුහල්පතිවරයෙක්. මව ගුරුවරියක්. ඒ දෙන්නගේ කාර්යබහුල ජීවිතය තුළ මගේ ආත්තම්මා ඒ කියන්නෙ අම්මගෙ අම්මා තමයි මාත් එක්ක නිරන්තරයෙන්ම හිටියෙ. මාව යහමගට ගත්තෙත් ඇය. අත්තම්මා හැමදාම මාව පාන්දර ඇහැරවලා පාඩම් කරවනවා. ඇය මට හැමතිස්සෙම කියපු දෙයක් තමයි අපි වැඩියෙන් දුන්නොත් අපිට වැඩියෙන් ලැබෙනවා කියල. මගේ ජීවිතේට අඩිතාලම දැම්මෙ ආත්තම්මා. ලංකාවේ අම්ම, තාත්ත ගැන සින්දු ලියවිලා තිබුණට අත්තම්මා ගැන සින්දු ලියවෙනවා අඩුයි. ඒ නිසයි මම හිතුවේ මගේ අත්තමට වගේම සියලුම අත්තම්මලාට උපහාරයක් වෙන විදිහට මේ සින්දුව ලියන්න.
සින්දුව හැදුණෙ මෙහෙමයි…
මේ සින්දුව ලිව්වේ මහාචාර්ය මෛත්‍රී පනාගොඩ. ඔහු ප්‍රබුද්ධ ගීත රචකයෙක්. අපි දෙන්නා කතා වුණා මේ සින්දුව හොඳ ගායකයෙක් ලව්වා ගායනා කරවිය යුතුයි කියල. එතනදි අපි දෙන්නම එකගතාවයකට ආවා මේක රෝහණ වීරසිංහ වැනි ප්‍රවීණ සංගීත අධ්‍යක්ෂකවරයෙකු හරහා මේ වැඩේ බාර දෙමු කියල. රෝහණ ලස්සන තනුවක් දාලා දුන්න. රෝහණගෙ අදහස වුණේ ගැඹුරු කටහඬකින් මේක කිවිය යුතුයි කියල. අන්තිමේ වැඩිය සින්දු ගායනා නොකළත් රෝහණම මේක ගායනා කරන්න බාරගත්තා.
විෂුවල් එකකුත් කළා..
මේ සින්දුවට විෂුවල් එකකුත් කළා. එතනදි ක්ෂේත්‍රයේ ප්‍රවීණයෙක් වන දයාරත්න රටගෙදරට කතා කළා. එතුමා තමයි මේකට ලස්සන විෂුවල් එකක් කරලා දුන්නෙ. විෂුවල් එකේ රොෂාන් පිලපිටිය, කුසුම් මල්දෙණිය රංගනයෙන් දායක වුණා.
ලැබෙන ආදායම වැඩිහිටි නිවාසයකට…
අපි මුලදිම කතා වෙලා හිටියා මේ සින්දුවෙන් ලැබෙන ආදායම වැඩිහිටි නිවාසයකට පරිත්‍යාග කරනවා කියල. පසුගිය 30 වැනිදා ‘මිත්තණිය’ ගීතය රිලීස් කළා. මම හිතනවා මේ ගීතය ජනගත වේවි කියල.
ඉඳල හිටලා කලා කටයුතුවල නිරත වෙනවා…
මම වසරකට සැරයක් ලංකාවට ඇවිත් විවිධ කලා කටයුතුවලට සම්බන්ධ වෙනව. රූපවාහිනීයේ විකාශය වෙන පෝය නාට්ටිවල රංගනයෙන් දායක වුණා. කෙටි චිත්‍රපටිවල රංගනයෙන් දායක වෙලා තියෙනවා.
එරංදි කෞශල්‍යා ✍️
