කාර්යබහුල රැකියාවන් කරන සියලුදෙනා බොහෝවිට තමන්ගෙ වැඩ පහසු කරගැනීම සඳහා විවිධ උපක්‍රමයන් භාවිත කරනවා. Bulk Cooking කියන්නෙත් එවැනි වූ උපක්‍රමයක්. විදෙස් රටවල බොහෝ කාන්තාවන් අතර මෙම ක්‍රමය ඉතා ජනප්‍රියයි. නමුත් අප රටේ බොහෝ දෙනාට මේ Bulk Cooking කියන දේ ගැන හරි අවබෝධයක් සහ පැහැදීමක් නැහැ. ඔබේ වැඩ බොහෝදුරට පහසු කරන සහ ඔබේ කාලය ඉතිරි කරන්න Bulk Cooking ක්‍රමයට පුළුවන්.
මොකක්ද Bulk Cooking කියන්නෙ?
Bulk Cooking එහෙම නැත්නම් තොග වශයෙන් ආහාර පිසීම යනු එක් දිනකදී හෝ සතියේ දිනකදි ඉදිරි සතිය පුරාවටම ප්‍රයෝජනයට ගැනීම සඳහා ආහාර පිස ශීතකරණයේ ගබඩා කර තැබීමයි. මෙසේ ආහාර පිස ගබඩාකර තැබීමෙන් එම සතියේ දී ඔබට කාලය වැය වන්නේ අවශ්‍ය වේලාවේදී අදාල ආහාර ප්‍රමාණය රත් කර ගැනීමට වැයවන කාලය පමණයි.
Bulk Cooking මගින් ලැබෙන ප්‍රයෝජන මොනවද ?
මුදල් ඉතිරි වීම
දිනපතා ආහාර පිසීම සඳහා ඔබට වරින්වර එළවළු මිල දී ගන්නට සිදු වුණත් ඔබ Bulk Cooking ක්‍රමය අනුගමනය කරනවා නම් මුළු සතිය සඳහාම අවශ්‍ය එළවළු එකවර තොග වශයෙන් මිලදී ගැනීම ඔබ අතින් සිදු වෙනවා. සුපිරි වෙළඳසැල්වල බොහෝවිට වට්ටම් සහිතව එළවළු මිලදී ගැනීම කළ හැකි නිසා මෙසේ තොග වශයෙන් ඔබ එළවළු මිල දී ගන්නා විට ඔබේ මුදල් ඉතිරි කරගත හැකි වේ.
කාලය ඉතිරි වේ
සතියේ එක් දවසකදී පැය දෙක තුනක් වැයකර ඔබ ආහාර පිසීම සිදු කරන නිසා දිනපතාම ආහාර පිසීමට ගතවන කාලය ඔබට සම්පූර්ණයෙන්ම ඉතිරි වනවා වගේම නිතර නිතර ඔබට නිවසට අවශ්‍ය එළවළු මිලදී ගැනීමට වැය වන කාලය ද ඉතිරි කර ගැනීමට ඔබට හැකියාව ලැබෙනවා.
සෞඛ්‍ය සම්පන්න ආහාර පරිභෝජනයට ඉඩ ලැබෙනවා
කාර්ය බහුල ජීවන රටාවකට හුරු වෙලා ඉන්න ඔබට සමහර දිනවලදී ව්‍යංජන කිහිපයක් සමග බත් පිසීමට කාලයක් නැති වෙන්න පුළුවන්. එවිට අවන්හලකින් ආහාර ඇනවුම් කිරීමට හෝ ක්ෂණික ආහාර වේලක රස විඳීමට ඔබට සිදු වනවා නමුත් ඔබ Bulk Cooking ක්‍රමය අනුගමනය කරන කෙනෙක් නම් කාර්යබහුල දිනක වුවත් ඔබ සතුව දැනටමත් ඔබ විසින්ම පිසූ පෝශ්‍යදායි ආහාර වේලක් තිබෙනවා.
එළවළු අපතේ යෑම නවතී
සමහර කාර්යබහුල දිනවලදී ඔබට ආහාර පිසීම සඳහා කාලයක් වෙන්කර ගැනීමට නොහැකි වෙන්නට පුළුවන්. එම නිසා ඔබ මිලදී ගෙන ශීතකරණයේ ගබඩා කර තබන එළවළු ඇතැම් විට අපතේ යාමක් සිදු වෙනවා Bulk Cooking ක්‍රමයේදී ඔබ එළවළු වර්ග සියල්ලම පිසින නිසා එවැනි අපතේ යාමක් සිදු වන්නෙත් නැහැ. එයින් සිදුවන්නේ ඔබ අතින් සිදුවිය හැකි නාස්තිය අවම වීමයි.
කොහොමද Bulk Cooking කරන්නෙ?
ඔබේ සතිය සැලසුම් කරන්න
ඉදිරි සතිය ඇතුලත ඔබේ සැලසුම් මොනවද ? රාත්‍රී ආහාර වේලක් සඳහා පිටතට යෑමට ඔබ අදහස් කරගෙන සිටිනවා ද ? නැතිනම් උපන්දින සාදයක් හෝ මිතුරු හමුවක් තිබෙනවාද ? උදෑසන, දහවල් සහ රාත්‍රී ආහාර වේල් සඳහා කොපමණ ආහාර ප්‍රමාණයක් ඔබට අවශ්‍ය ද ? මේ සියලු කරුණු ගැන ඔබේ සතිය සැලසුම් කිරීමේදී ඔබ සැලකිලිමත් විය යුතුයි.
ඔබේ ආහාර වට්ටෝරු ගැන සැලසුම් කරන්න
ඔබ ඔබේ සතිය සැලසුම් කිරීමෙන් පසුව අවධානය දිය යුත්තේ ඔබේ ආහාර වට්ටෝරුවලටයි. විශේෂයෙන්ම ප්‍රධාන ආහාර වේල් තුන සඳහා සෞඛ්‍ය සම්පන්න ආහාර ඇතුළත් කිරීමට ඔබ සැලකිලිමත් වෙන්නට ඕනෙ. එළවළු සහ පලතුරු, ධාන්‍ය වර්ග, මස් සහ මාළු වර්ග, කිරි නිෂ්පාදන යන සියල්ල මෙයට ඇතුළත් විය යුතුයි. රාත්‍රී ආහාර වේල් සඳහා සුප් වර්ග, විශේෂ බත් සහ නූඩ්ල්ස් වර්ග, සැන්විච් ආදිය ඇතුළත් කිරීමට ඔබට හැකිය. ඒ වගේම එක් එක් දිනවලට විවිධ වූ ආහාර වර්ග මාරු කරමින් ගැළපෙන ලෙස ආහාර වට්ටෝරු සකස් කිරීමට ඔබ නිර්මාණශීලී විය යුතුය.
බඩු ලැයිස්තුවක් සකස් කිරීම
ඔබ සකස්කළ ආහාර වට්ටෝරුවලට අනුව නිවසේ දැනට ඔබ සතුව නැති අමුද්‍රව්‍ය, එනම් එළවළු හා පලතුරු වර්ගවල සිට සියල්ල ඔබ ඔබේ බඩු ලයිස්තුවට ඇතුළත් කළ යුතුයි. ඒ වගේම ඒවා කුමන ප්‍රමාණවලින් අවශ්‍ය වේ දැයි සටහන් කර ගැනීමත් ඔබට වඩාත් පහසු වනු ඇත.
පෙර සූදානම
ඉදිරි සතිය සදහා ආහාර පිසීමට ඔබ සූදානම් විය යුත්තෙ සති අන්තයේ දිනයක හෝ ඔබට පැය කිහිපයක් වැය කළ හැකි විවේකී දිනයකය. ඔබට අවශ්‍ය සියලු අමුද්‍රව්‍ය සහ උපකරණ සූදානම්කරගෙන ආහාර වට්ටෝරුවලට අනුව එක් එක් වෑංජනය පිළියෙල කළ යුතුයි. ඒ වගේම ව්‍යාංජන සඳහා අවශ්‍ය පොදු අමුද්‍රව, එනම් ලූනු, සුදු ලූනු, අමුමිරිස් සහ කරපිංචා වැනි අමුද්‍රව්‍ය එකවර කපා සූදානම් කර ගැනීමෙන්ද ඔබට කාලය ඉතිරි කර ගත හැකියි.
ආහාර බෙදීම සහ ගබඩා කිරීම
ආහාර තොග වශයෙන් පිසීම පමණක් නොව ඒවා නිසි ලෙස බෙදා වෙන් කිරීම සහ ගබඩා කිරීමද වැදගත්. ආහාර ගබඩා කිරීම සඳහා ඔබ තෝරා ගත යුත්තේ වාතය ඇතුළු නොවන ලෙස පියනකින් වැසිය හැකි වීදුරු භාජනයි. එම වීදුරු භාජන හොඳින් පිරිසිදු කර පිස දමා සූදානම් කර තබා ගත යුතුයි.
ඔබ ආහාර පිසූ පසුව ඒවා හොඳින් සිසිල් වීමට ඉඩ හරින්. ඉන්පසුව එක වේලකට අවශ්‍ය වේ යැයි සිතෙන ප්‍රමාණය භාජනවලට අසුරන්න. එසේ ඇසිරීමෙන් එකම භාජනයෙන් වරින් වර ව්‍යාංජන ගැනීමට ඔබට සිදු නොවේ. ඉන්පසුව ඔබ කැමතිනම් ව්‍යංජනයේ නම සඳහන් කළ ලේබල් භාජනයේ ඇලවීමට ද ඔබට පුළුවන්. වෑංජන දැමූ භාජන ශීතකරණයේ ගබඩා කිරීමේදී ඒවා එළියට ගැනීමට පහසු වන ආකාරයට පිළිවලින් අසුරන්න.
Bulk Cooking ක්‍රමය මුල් දිනවලදී ඔබට වෙහෙසකර එකක් වෙන්න පුළුවන්. එමෙන්ම කලින් දිනක පිසූ ආහාර රත් කර ආහාරයට ගැනීමත් ඔබට තරමක් අපහසු වෙන්නට පුළුවන්. නමුත් ටික දිනක් ගත වන විට ඔබේ කාලය මෙන්ම ශ්‍රමය බොහෝ සේ ඉතිරි වන බව ඔබටම දැනේවි. එවිට ඔබට දැනුන වෙහෙසකර බවත් අපහසුවත් ගිලිහී යනු නොඅනුමානයි.
අර්චිත ඉඳුවර ✍️
