1948 වසරට පෙරාතුව ශ්‍රී ලංකාව හඳුන්වනු ලැබුවේ British Ceylon යන නාමයෙන්. මේ අවධිය වනවිට රූප රාජිණියන් තේරීම පිළිබඳව වූ තරඟ එතරම් ජනප්‍රිය නැහැ.
නමුත් ඉන්දියාවල ශ්‍රී ලංකාව වැනි ආසියාතික රටවල් තුළ කාන්තාවන්ගේ ලස්සන ගැන වැඩි අවධානයක් යොමු වී තිබුණා.
විවාහයේදී බොහෝ විට කාන්තා රුවට මුල් තැන ලැබුණෙත් ඒ නිසයි. 1951 වසරේදී එරික් මෝලි විසින් මුල්ම රූප රාජණියන් තේරීමේ තරඟයක් සංවිධානය කරනු ලැබුවා. මෙය විවාහක රූ රැජිණ තරඟයක්.
කොළඹ පවත්වන ලද මෙම තරඟයට ශ්‍රී ලංකාවෙන් මානෙල් ඉලංගකෝන් සහභාගී වුණා. ඒ වනවිට ඇගේ වයස අවුරුදු 20 යි. මෙම ඉසව්වෙන් ජයගත් මානෙල්ට එංගලන්තයේ පැවැත්වෙන Miss world අවස්ථාවටත් සම්බන්ධ වීමට අවස්ථාව ලැබුණා.
නමුත් මේ වනවිටත් ඇය විවාහක වුවත් එය ඉසව්වට සහභාගී වීමට බාධාවක් වුණේ නැහැ. මේ නිසා මානෙල් ඇගේ සැමියා සමග එංගලන්තය බලා පිටත් වුණා. එතෙක් ඇය විදේශ රටක සංචාරයේ යෙදුන කාන්තාවක් නොවෙයි.
මේ කාලයේදී එංගලන්තයේ ශ්‍රී ලංකා තානාපති ලෙසින් එඩ්වින් විජේරත්න මහතා සේවයේ යෙදී සිටියා. එඩ්වින් තානාපති විසින් ඉලංගකෝන් යුවල ඉතා උණුසුම් ලෙසින් පිළිගත්තා.
Miss world තරඟ ඉසව්ව
1953 වසරේ ඔක්තෝම්බර් 19 වැනි දින මෙම තරඟය පැවැත්වුණේ ලන්ඩනයේ ලයිසිම් බෝල්රූම් ශාලාවේදී. නමුත් ඇය පිහිනුම් ඇඳුමෙන් පෙනී සිටීම ප්‍රතික්ෂේප කරමින් සාරියෙන් ඒ අවස්ථාවට සහභාගී වුණා.
නමුත් සාරිය ඇයට හරස් වුණේ නැහැ. මේ තරඟකරුවන් අතරින් අවසාන දහ දෙනා අතරට එක් වීමට මානෙල්ටත් අවස්ථාව ලැබුණා.
මේ අතරින් අවසාන පස් දෙනා තෝරාගන්නේ රහස් ඡන්දයකින්. කොහොම වුණත් ඇය අන්තිම පස් දෙනා අතරටත් තේරී පත් වුණා. එයින් මානෙල් ඉලංගකෝන් සිව්වැනි ස්ථානයට තේරීපත්වුණා.
ඇයට පවුම් 150 ක මුදල් ත්‍යාගයක් ලැබුණා. 1953 වසරේ පැවැති මෙම Miss world තරගාවලියෙන් ලෝක රූ රැජින ලෙසින් ප්‍රංශයේ Denise Perrier තේරී පත් වුණා.
දෙවැනි ස්ථානය ග්‍රීසියේ Marina Papaelia ට සහ තෙවැනි ස්ථානය ඊජ්ප්තු ජාතික කාන්තාවක් දිනා ගත්තා.
විකිපීඩියා ඇසුරිනි
පුන්‍යා චාන්දනී ද සිල්වා ✍️
