Icon Of The Seas
ලොව විශාලතම මගී ප්‍රවාහන නෞකාව ලෙසින් සැළකෙන “අයිකන් ඔෆ් ද සීස්” එහි පළමු සංචාරකයන් පිරිස රැගෙන සිය මංගල ගමන ආරම්භ කර තිබෙනවා. අමෙරිකාවේ ෆ්ලොරීඩාවේ මියාමි සිට නෞකාව ගමන් ආරම්භ කර ඇති අතර දින 7 ක් කැරිබියන් දූපත් ආශ්‍රිතව සිය මංගල ගමන සිදු කිරීමට නියමිතයි.
2016 ඔක්තෝම්බර් මාසයේදී Royal Caribbean සහ Meyer Turku විසින් “Icon” යන ව්‍යාපෘති නාමය යටතේ නැව් දෙකක් තැනීමට වූ යෝජනාව මඟින් මෙම නැව තැනීමේ ආරම්භය සිදුව තිබෙනවා. එමෙන්ම Icon Of The Seas සඳහා වානේ කැපීම 2021 ජූනි මාසයේදී ආරම්භ කර තිබෙනවා.
එකවර මගීන් 6600 කට වඩා වැඩි ප්‍රමාණයක් මෙම නෞකාවෙන් එහා මෙහා ගෙන යාමට හැකියාව පවතිනවා. ඒ වගේම නැවේ සේවකයන් 2000 කට අධික පිරිසක් සේවය කරන බවටයි වාර්තා වන්නෙ. අඩි 1,198 ක් දිග, ටොන් 248,663 ක් බර “අයිකන් ඔෆ් ද සීස්” විනෝදස්වාදය උපරිමෙයෙන් පිරි මගී ප්‍රවාහන සුඛෝපභෝගී නෞකාවකි.
1912 වසරේදී අවාසනාවන්ත ලෙස අනතුරකට මුහුණ දුන් ටයිටැනික් නෞකාවට වඩා පස් ගුණයකින් විශාල මෙම නැව තට්ටු 18 කින් සමන්විත වෙනවා. රෝයල් කැරිබියන් කෲස් ලයින් සමාගම විසින් ඩොලර් බිලියන 2 ක් වැයකර ඉදිකරන ලද මෙම දැවැන්ත නෞකාව විශාල පිහිනුම් තටාක හතක් සහ විශාල දියඇලි හයකින් සමන්විත වෙනවා. එයින් එක පිහිනුම් තටාකයක් තමයි ලොව ඕනෑම මගී ප්‍රවාහන නෞකාව තිබෙන ගැඹුරුම පිහිනුම් තටාකය වන්නෙ.
මෙම නැවේ ආපනශාලා සහ තැබැරූම් හතලිහකට අධික ප්‍රමාණයක් තිබෙනවා. එයින් එක් තැබෑරුමක් විශේෂ වෙනවා. එයට හේතුව වන්නෙ බීම වර්ග පිළිගැන්වීමට වේටර්වරු වෙනුවට රොබෝ අත් එහි තිබීමයි. ඒ තරම් දියුණු තාක්ෂණික ක්‍රම උපයෝගී කරගෙන තමයි මෙම නෞකාව ඉදිකර තිබෙන්නේ. ඒ වගේම කුඩා දරුවන්ට ක්‍රීඩා කිරීමට උද්‍යාන කිහිපයක් මෙම නෞකාව සතුවෙනවා.
හරියටම නැව මැද සෙන්ට්‍රල් පාර්ක් එකක් තිබෙනවා. එය එකවර 2000 කට අධික පිරිසකට නැරඹීමේ හැකියාව පවතිනවා. නිෂ්පාදිත සමාගම පවසන්නේ නැවේ උසම දිය ඇල්ල, උසම ජල ස්ලයිඩය, විශාලතම ජල උද්‍යානය ලෝකයේ මෙතෙක් පවතින නෞකාවලින් අත්විඳිය නොහැකි නවමු අත්දැකීමක් මෙම නෞකාව මඟින් ලැබිය හැකි බවයි.
මෙම නෞකාවේ තිබෙන මුළුතැන්ගෙයි දවසකට ආහාරවේල් තිස්දාහකට වඩා වැඩි ප්‍රමාණයක් සෑදීමට හැකියාව පවතිනවා. ඒ වගේම මෙම කුස්සියට සතියකට ආසන්න වශයෙන් මිලියන එකක ආහාරපාන හා අමුද්‍රව්‍ය අවශ්‍ය වන බවටයි පැවසෙන්නෙ.
මෙම නැවේ බහු ඉන්ධන එන්ජින් හයක් ඇති අතර එය 67,500 kW බලයක් ජනනය කරනවා. එන්ජින් LNG සහ ආසවනය කරන ඉන්ධන යන දෙකින්ම බලගැන්විය හැකිය. නමුත් පරිසරවේදීන් අනතුරු අඟවන්නේ ස්වභාවික ද්‍රව වායුවකින් ක්‍රියාත්මක වන නිසා මෙම නෞකාවෙන් අහිතකර මීතේන් වාතයට කාන්දු වන බවයි. ස්වභාවික ද්‍රව වායු සාගර ඉන්ධනයක් ලෙස භාවිතා කිරීමෙන් සමුද්‍ර වායු තෙල්වලට වඩා 120% වැඩි හරිතාගාර වායු විමෝචනයක් වන බව ඇස්තමේන්තු කර ඇති බවයි ඔහු පවසා ඇත්තේ.
අර්චිත ඉඳුවර ✍️
