පිළිස්සුමක් වුණොත් විනාඩි 15ක් හෝ 20ක් ගලා යන සීතල ජලයට අල්ලන්න

නිවසේදී වගේම බාහිර ස්ථානයකදී වයස් භේදයක් නොමැතිව අප කාටත් පිළිස්සීමකින් තුවාල ඇති වෙන්න පුළුවන්. මේ අන්දමින් පිළිස්සීම් තුවාලයක් ඇති වූ පසු රෝගියෙකු විසින් ඒ ගැන අනුගමනය කළ යුතු ක්‍රියා පිළිවෙත් මොනවාද?මේ විදිහට පිළිස්සීමකින් තුවාලයක් සිදු වූ විට එය වර්ග තුනකට බෙදා දක්වන්න පුළුවන්.

First Degree Burn
Second Degree Burn
Third Degree Burn

First Degree Burn පිළිස්සුම් තුවාලයක ලක්ෂණ

මේ අවස්ථාවේදී සමේ බාහිරව ඇති Epidomis කොටසට හානි සිදුවනවා. එවැනි අවස්ථාවක දක්නට ලැබෙන ලක්ෂණ

පිළිස්සුම් ස්ථානයේ වේදනාව

තුවාලය රතු පැහැවීම

එම ස්ථානය අල්ලන විට ඇතිවන වේදනාව

පිළිස්සුම් ප්‍රදේශය අවට සුළු වශයෙන් ඉදිමුම

අපි බලාපොරොත්තු වුණත් First degree Burn පිළිස්සුම් අවස්ථාවකදී දිය පට්ටා මතු වෙන්නේ නැහැ. ඒ වගේම තුවාලය වියළී යෑමත් සමග කැලැලක් නොමැතිව සුවවීමත් විශේෂයක්. ඒ නිසා තද රස්නයක් නැති යමක් සමග ස්පර්ශ වීම නිසා ඇතිවන තුවාලවලට නිවසේදී යම් ප්‍රතිකාරයක් කිරීමෙන් පසුව සුවය ලබාගැනීමටත් පුළුවන්.

Second Degree Burn පිළිස්සුම් තුවාලයක් හඳුනාගැනීම

මේ අදියරේදී පිළිස්සුම් තුවාලයකින් සමේ Epidomis කොටසට වගේම Dermia කොටසත් ඇතුළුව වූ කොටස් දෙකටම හානි සිදුවනවා.

Second Degree Burn තුවාලයක ලක්ෂණ

පිළිස්සුම් තුවාලය රතු,රෝස පැහැයෙන් තිබීම

තද වේදනාවක් දැනීම

තුවාලය ස්පර්ශ කරන විට අධික වේදනාවක් දැනීම

තුවාලය අවට ප්‍රදේශය ඉදිමීම හා රතුවීම

තුනී බිත්තියකින් වට වූ වතුර පිරුණ බුබුළු හෙවත් දියපට්ටා මතුවීම

මෙම අදියරේ පිළිස්සුම් තුවාල දින දෙක තුනකින් සුවය ලබනවා. ඒ අතරම තුවාලය සුව ස්ථානයේ කැළැල් ඇතිවීම එහි ගැඹුර මත රඳාා පවතිනවා. පිළිස්සුම් තුවාලයක් සිදුවුණොත් අවදානම් සහගත තත්ත්වයක් ඇතිවීමට පුළුවන්. එවැනි අවදානම් තත්ත්වයක් ඇතිවීමට බලපාන හේතු…

වයස අවුරුද්දකට වඩා අඩු දරුවකු වීම

රසායනික ද්‍රව්‍ය හෝ විදුලිය නිසා සිදු වු පිළිස්සුම් තුවාලයක් වීම

මුහුණ, අත්, කකුල්, ඉකිළි හා මුත්‍රා ප්‍රදේශය ආශ්‍රිතව ඇතිවන තුවාලයක් වීම

දරුවාට දුම ආඝ්‍රාණය වී තිබීම

ශරීර ප්‍රමාණයෙන් 5% කට වඩා බලපාන ලෙස සිදුවන තුවාල ( තුවාලය ඔබේ අත්ලට වඩා ප්‍රමාණයෙන් විශාල නම් )

වෙනත් රෝගාබාධ තිබීම

ශරීරය වටා පිළිස්සුම් තුවාල තිබීම ( Circular Burn ) තිබීම

මෙවැනි අවස්ථාවක නිවසේදි ප්‍රතිකාර ලබා දීමට වඩා රෝහල වෙත දරුවා රැගෙන යෑම වඩාත් සුදුසුයි.

Third Degree Burn තුවාලයක් හඳුනගන්නේ කොහොමද?

සමේ ස්ථර තුනටම බරපතළ හානි සිදු වී ඇත්නම් අපි එය Third Degree Burn  වශයෙන් හඳුන්වනවා. මෙම අවස්ථාවක සමේ ගැඹුරටම තුවාලය විහිදෙන අතර එම ස්ථානයේ ස්නායු පටක විනාශ වී ඇති නිසා වේදනාව දැනෙන්නේ නැහැ. මෙවැනි අවස්ථාවකදී වහාම රෝගියා රෝහල්ගත කිරීම වැදගත්.

අවදානමක් නැති පිළිස්සුම් තුවාලයකදී කළ හැකි ප්‍රතිකාර

පිළිස්සුම සිදු වූ ස්ථානයේ අවට ඇති ඇඳුම් ඉවත් කරන්න. විශේෂයෙන් උණුවතුර හැලී ඇති අවස්ථාවක ඇඳුම් නිසා තව දුරටත් පිළිස්සීම පැතිරීම වළක්වා ගැනීමට පුළුවන්.

කමිස අත්, හා කලිසම් උඩට රෝල් කිරීම සුදුසු නැහැ. එවිට පිළිස්සුම් ස්ථානය ඉදිමී, ඇඳුම්වලට තදවී රුධිර ගමනාගමනයට බාධා වීමට පුළුවන්.

වළලු, නූල්, වැනි අතේ බැඳ ඇති දේවල් ඉවත් කරන්න.

පිළිස්සුණ ස්ථානය අතගෑම වගේම දැවිල්ල නිසා පිඹීමත් සුදුසු නැහැ.

හැකි ඉක්මණින් එම ස්ථානය විනාඩි 15 ක් 20 ක් පමණ ගලා යන සීතල ජලයට අල්ලා ගෙන සිටින්න. එවිට තුවාලය නිසා ඇතිවන දැවිල්ල නැතිවනවා වගේම තුවාලය සුව වීමටත් හේතු වෙනවා.

තුවාලය මත අයිස් කැට තබන්න එපා.

දත් බේත්, එඬරු තෙල්, තලතෙල් වැනි දේවල් තුවාලය මත තබන්න එපා.

දියපට්ටා මතු වී ඇත්නම් ඒවා හිතාමතා පුපුරා යවන්න එපා.

තුවාලය ස්පර්ශ කරන විට අත්වැසුම් භාවිත කරන්න

නොඇලෙන සුළු බැන්ඩේජ් එකකින් තුවාල කොටස පමණක් ආවරණය කරන්න. වටේටම ඔතන්න එපා

කපු පුළුන් තුවාලය මත තබන්න එපා.

මෙවැනි අවස්ථාවක භාවිත කරන නොඇලෙන සුළු විශේෂිත ආවරණ වෙළුම් පටි ඔසුසල්වලින් මිලට ගත හැකියි. විශේෂයෙන් ඔබේ නිවසේ කුඩා දරුවන් සිටිනවා නම් මෙවැනි බැන්ඩේජ් එකක් නිවසේ ප්‍රථමාධාර පෙට්ටියේ තබාගැනීම වැදගත්. සුළු පිළිස්සුම් තුවාල හැර දියපටට්ටා මතුවුණ තුවාල සඳහාත් වෛද්‍ය ප්‍රතිකාර ලබා ගැනීම සුදුසු බව මගේ අදහසයි.

පිළිස්සුම් තුවාල වළක්වා ගන්නේ කෙසේද?

අනතුරු අවදානම් ඇති දේවල් ගැන අවධානය දක්වන්න. විශේෂයෙන් අබලන් වුණ විදුලි ස්විච් වැනි දේවල් වගේම උණු වතුර බෝතල්, දැල්වෙන ඉටිපන්දම්, පහන් ආදිය ගැන සැලකිලිමත් වෙන්න.

පුන්‍යා චාන්දනී ද සිල්වා