සුදු ලූනු එහි තියුණු සුවඳ සහ සුවිශේෂී රසය නිසාම සියවස් ගණනාවක් පුරා මුළුතැන්ගෙයි ප්‍රධාන අමුද්‍රව්‍යයක් ලෙස භාවිතයේ පවතී. කෑම වර්ගවල රසය වැඩි කිරීමට ඇති හැකියාව සම්බන්ධයෙන් ජනප්‍රිය මෙම කුඩා බල්බයක් වැනි සුදු ලූනු ඖෂධීය වටිනාකමකින් පොහොසත් ඉතිහාසයකට ද හිමිකම් කියනවා. සුදු ලූනු ඔබ නොදන්නා සෞඛ්‍ය ප්‍රතිලාභ රාශියක තිබෙනවා. ප්‍රතිශක්තිකරණ පද්ධතිය ඉහළ නැංවීමේ සිට හෘද සෞඛ්‍යය ප්‍රවර්ධනය කිරීම දක්වා සුදු ලූනුවල ඖෂධීය ගුණාංග ලොව පුරා ජනප්‍රියත්වයට පත්ව ඇත.
ප්‍රතිශක්තිකරණ පද්ධතියට ඉතා හිතකරයි
සුදු ලූනුවල ඇලිසින් නම් ප්‍රතික්ෂුද්‍ර ජීවී ගුණ ඇති ප්‍රබල සංයෝගයක් තිබෙනවා. මෙම සංයෝගය ශරීරයේ ඇතිවන ආසාදනවලට එරෙහිව සටන් කිරීමට සහ ශක්තිමත් ප්‍රතිශක්තිකරණ පද්ධතියක් ගොඩනගාගැනීමට ඔබට සහාය වෙනවා. සුදු ලූනු නිතිපතා පරිභෝජනය කිරීමෙන් සෙම්ප්‍රතිශ්‍යාව සහ උණ ඇතිවීමේ අවදානම අවම කර ගත හැකි අතර ප්‍රතිශක්තිකරණ පද්ධතිය ඉහළම තත්ත්වයක ඔබට තබාගැනීමට හැකිවෙනවා.
හෘද සෞඛ්‍ය වැඩි දියුණු කරයි
අධ්‍යයනවලින් හෙළි වී ඇත්තේ සුදු ලූනු රුධිර පීඩනය සහ කොලෙස්ටරෝල් මට්ටම අඩු කිරීමට උපකාරී වන අතර එය හෘද වාහිනී රෝගවලට එරෙහි සටනේ විශිෂ්ටයෙකු බවයි. ඇලිසින් මෙහිදීද වැදගත් කාර්යභාරයක් ඉටු කරනවා. එමගින් රුධිර නාල ලිහිල් කිරීම, වඩා හොඳ රුධිර සංසරණයක් ප්‍රවර්ධනය කිරීමට සහ හෘද ආශ්‍රිත ගැටලු ඇතිවීමේ අවදානම අඩු කිරීමට උපකාරී වේ.
පිළිකා වැළැක්වීමට
සුදු ලූනුවල කාබනික සල්ෆර් සංයෝග අඩංගු වන නිසා ඒවා මගින් පිළිකා වැළැක්වීමට සම්බන්ධ වේග මෙම සංයෝග පිළිකා සෛල වර්ධනය බාධා කිරීමට සහ ආමාශයේ සහ මහා බඩවැලේ පිළිකා ඇතුළු ඇතැම් පිළිකා වර්ග ඇතිවීමේ අවදානම අඩු කිරීමට උපකාරී වේ. ඒ අනුව සුදු ලූනු ආහාරයට ගැනීම මගින් පිළිකා අවදානම අඩු කර ගත හැකි වේ.
ශරීරයේ විෂ ඉවත් කිරීමට දායක වෙයි
සුදු ලූනු සිරුරේ ස්වභාවික විෂ ඉවත් කිරීමේ ක්‍රියාවලියට සහාය වේ. එය ආහාර ජීර්ණ පද්ධතියෙන් විෂ ද්‍රව්‍ය පෙරන එන්සයිම නිපදවීමට අක්මාවට උපකාර කරනවාග සුදු ලූනු නිතිපතා පරිභෝජනය ශරීරයෙන් හානිකර ද්‍රව්‍ය ඉවත් කිරීමට, සමස්ත සෞඛ්‍යය සහ යහපැවැත්ම ප්‍රවර්ධනය කිරීමට උපකාරී වේ.
පෝෂ්‍ය පදාර්ථවලින් අණූනයි
සුදු ලූනු අඩු කැලරි පමණක් නොව අත්‍යවශ්‍ය පෝෂ්‍ය පදාර්ථවලින්ද පිරී ඇත. එහි විටමින් C සහ B6, මැංගනීස් සහ සෙලේනියම් අඩංගු වන අතර ඒවා ඔබේ සිරුර සෞඛ්‍ය සම්පන්නව තබා ගැනීම සඳහා වැදගත් කාර්යභාරයක් ඉටු කරන අතර කායික ක්‍රියාවලීන්ගේ නිසි ක්‍රියාකාරිත්වයටද දායක වේ.
( අන්තර්ජාලය ඇසුරෙන් )
අර්චිත ඉඳුවර
