ජනගහණය අධික වීමත්, පරිසරය හා සෞඛ්‍ය ගැන බොහෝ දෙනා තුළ උනන්දුවක් නොමැතිකමත් නිසා පරිසර හා ආහාර දූෂණය උග්‍ර වී ඇත. මේ නිසා ලෙඩ රෝග ව්‍යප්තවීම සහ අලුතින් රෝග තත්ත්ව මතුවීමට වෙනදාට වඩා වැඩිය. එමනිසා අප නිරන්තරයෙන් යම් රෝග ලක්ෂණයක් මතුවූ විට ඒ සඳහා කළ යුතු සහ නොකළ යුතු සෞඛ්‍ය පරීක්ෂණ ගැන අවබෝධයෙන් සිටිය යුතුය.
මොකක්ද මේ ආසාත්මික රුධිර පරීක්ෂාව
සිරුරේ ප්‍රතිශක්තිකරණ පද්ධතිය මගින් වෛරස් හා බැක්ටීරියා වැනි රෝගකාරක වලට එරෙහිව ප්‍රතිදේහ නිපදවනු ලබයි. සිරුරේ ප්‍රතිශක්තිකරණ පද්ධතියට සම්බන්ධ පොදු, දිගුකාලීන අසාත්මික තත්ත්වයක් ඇති අයට ඇතැම් ආහාර නිසා ආසාත්මිකතාව වැළඳිය හැකිය. එවැනි පුද්ගලයකුගේ සිරුරට පරාග හෝ රටකජු වැනි හානිකර නොවන ද්‍රව්‍ය එකක් හෝ කිහිපයක් ඇතුලු වීමක් සිරුරට වන තර්ජනයක් ලෙස ප්‍රතිශක්තිකරණ පද්ධතිය මගින් හඳුනා ගැනීමට ඉඩ ඇත.
එවිට ප්‍රතිශක්තිකරණ පද්ධතිය මගින් ඊට එරෙහිව සටන්කිරීමට IgE ප්‍රතිදේහ නිපදවයි. එමගින් ආසාත්මිකතා රෝග ලක්ෂණ ඇතිකරයි. එවැනි අවස්ථාවල රුධිරයේ ඇති Immunoglobulin E (IgE) නම් ප්‍රතිදේහ ප්‍රමාණය මනිනු ලැබේ. ඔබට ආසාත්මිකතා රෝග ලක්ෂණ ඇති වී තිබේ නම් ඔබේ රුධිර පරීක්ෂාවේ ඇති IgE නමැති ප්‍රතිදේහ මට්ට්ම තිබිය යුතු සාමාන්‍ය ප්‍රමාණයට වඩා වැඩි වේ.
ආසාත්මිකතාකාරක
ආසාත්මිකතා ඇතිකළ හැකි හානිකර ද්‍රව්‍ය ආසාත්මිකතාකාරක ලෙස හැඳින්වේ. ඒ යටතට පරාග, දූවිලි, පුස්, දිලීර, ඇට වර්ග සහ බෙල්ලන් ඇතුලු ඇතැම් ආහාර, පෙන්සිලින් වැන ඖෂධ මේ ගණයට වැටේ.
ආසාත්මිකතා රෝග ලක්ෂණ
නාසය හිරවීම කැසීම, කඳුලු ගැලීම, කැසීම, පාචනය, වමනය, කිවිසුම් යෑම, ඇදුම හෝ අසංරක්ෂක ප්‍රහාරය වැනි ජීවිත තර්ජනක් පවා විය හැකි රෝග තත්ත්ව මෙමගින් ඇති විය හැකිය.
පරීක්ෂණයෙන් කුමක් සිදුකෙරේද?
මෙමගින් ප්‍රතිශක්තිකරණ පද්ධතිය මගින් ආසාත්මිකතාවකට එරෙහිව නිපදවා ඇති ඔබේ රුධිරයේ ඇති මුළු IgE ප්‍රතිදේහ ප්‍රමාණය මැන බැලේ. IgE ප්‍රතිදේහ ප්‍රමාණය අධික නම් ඔබ ආසාත්මිකතාවකට අවදානම් වන සෞඛ්‍ය තත්ත්වයකට ගොදුරු වී ඇති බව වෛද්‍යවරුන්ට හඳුනාගත හැකිය. රුධිර පරීක්ෂණයට හැරුණුකොට ආසාත්මිකාරක සෘජුවම සමට දමා කෙරෙන පරීක්ෂණයක්ද වෙයි.
(https://medlineplus.gov/ ඇසුරෙන්)
සුනිල් අල්ගම
