අද සමාජයේ විවිධ හිංසනයන් බහුලයි. සමහරුන් මෙය විනෝදාංශයක් ලෙස භාවිත කරන අතර තවත් සමහරු තම මානසික ආතතිය එමගින් පිටකර ගනි. එහෙත් වර්ධනය වෙමින් සිටින දරුවන් වෙතට එල්ලවන හිංසනය ඔවුන්ට දරාගත නොහැකියි. පසුකාලීන මානසික ආතතිවලට එය හේතුවිය හැකියි. වැඩිහිටියන් වශයෙන් ඒ ගැන අවධානය යොමුකළ යුතු බව එක්සත් ජාතීන්ගේ ජාත්‍යන්තර ළමා හදිසි අරමුදල හෙවත් යුනිසෙෆ් අවධාරණය කරයි.
හිංසනය කවරාකාරද?
ළමයින් වෙත එල්ල කෙරෙන හිංසනය තෙවැදෑරුම්ය. ඒ අභිප්‍රාය, පුනරාවර්තනය සහ බලය (Intent, Repetition, and Power) යනුවෙනි. එසේම පිරිමි දරුවන් ශාරීරික හිංසනවලට විවෘත වීමට වැඩි ඉඩක් ඇති අතර ගැහැනු ළමුන් වැඩි වශයෙන් මානසික හිංසනයන්ට ගොදුරු වේ.
හිංසනය හැසිරීම් රටාවකි
මෙය හුදෙකලා සිදුවීමකට වඩා වෙනස් හැසිරීම් රටාවකි. තමුන්ට වඩා ලොකු, ශක්තිමත් හෝ ජනප්‍රිය යැයි පෙනෙන ඉහළ සමාජ තත්ත්වයක් හෝ බලයක් ඇති දරුවන් අතින් බොහෝ විට මෙම හිංසනයන් එල්ල වේ. කොන් කරන ලද සමාජවලට අයත් දුප්පත්, ස්ත්‍රී-පුරුෂ මිශ්‍ර ලිංගික ස්වභාව ඇති, ආබාධිත, සංක්‍රමණික හෝ සරණාගත දරුවන දරුවන් මෙම හිංසනයන්ට ගොදුරුවීමේ ප්‍රවණතාව වැඩිය.
විවෘතව සහ නිතරම කතාකරන්න
කෙටිකාලීන හා දිගුකාලීන මානසික හා සෞඛ්‍ය ගැටලුවලට හේතුවන හිංසනය පන්තියේ කාර්යසාධනය අඩුවීම හා මත්ද්‍රවලට පෙළඹවීමටද හේතුවේ. හිංසනය ගැන දරුවා සමග නිතරම විවෘතව කතාකරන්න. එවිට දරුවා තමාට වෙනත් අයකුගෙන් සිදුවන හිංසනයක් ගැන පැවසීමට ලැජ්ජා නොවනු ඇත. දරුවාගේ වැඩ සහ පන්ති ක්‍රියාකාරකම් දිනපතා පරීක්ෂා කරන අතරම මාර්ගගතවද දරුවාගෙන් ඒවා ගැන විමසන්න.
ධනාත්මක ආදර්ශ මොඩලයක්
දරුවන් හිංසනය ගැන ධනාත්මක ආදර්ශ මොඩලයක් ලෙස කටයුතු කිරීමේදී ඔවුන් අනෙකාට ගෞරවාන්විතව සැලකීමට පෙළඹෙන අතර, තමුන්ට සිදුවන හිංසනය හඳුනාගැනීමට හැකිය. හිංසනය කරන කෙනෙකුටද තමුන් කරන්නේ හිංසනයක් බව වැටහෙන අතර, බලා සිටින දරුවන්ටද හිංසනය අවබෝධ කරගෙන වින්දිතයා වෙනුවෙන් පෙනීසිටිය හැකිය.
දරුවාගේ ආත්ම විශ්වාසය
හිංසනයෙන් වැළකීම සඳහා දරුවාගේ ආත්ම විශ්වාසය ගොඩනගන්න. සමාජය හා එකමුතු ක්‍රියාකාරකම් සඳහා දරුවා දිරිමත් කිරීම මගින් විවිධ රුචිකත්ව ඇති මිතුරන් සමූහයක් හා කටයුතු කිරීමට දරුවාට හැකිවනු ඇත.
ඔබද ආදර්ශ මොඩලයක් වෙන්න
අවට සිටින පුද්ගලයින්ට හා වැඩිහිටියන්ටද, වෙනත් දරුවන්ටද ඔබ කරුණාවෙන් සහ ගෞරවයෙන් සලකන්න. අන්තර්ජාලයේ හැසිරිය යුතු ආකාරයද ක්‍රියාවෙන් පෙන්වන්න.
ඔවුන්ගේ අන්තර්ජාල ක්‍රියාකාරකම්වල ඔබද කොටසක් වෙන්න
අන්තර්ජාල කටයුතුවලදී දරුවන් හා සම්බන්ධ වෙමින් මුහුණදිය හැකි විවිධ අවදානම් පැහැදිලි කරන්න.
විමසිලිමත් වෙන්න
දරුවන් වාචිකව යමක් ප්‍රකාශනොකරන අවස්ථාවල දරුවාගේ චිත්තවේගී ලක්ෂණ පිළිබඳව අවධානයෙන් සිටීමෙන් ඔබට ඉක්මනින් ක්‍රියාකාරී විය හැකිය.
( https://www.unicef.org/ ඇසුරෙන්)
සුනිල් අල්ගම
