නිවසකට ඇතුළුවන සහ පිටවන දොරවල් සමග වාස්තු විද්‍යාත්මක කරුණු බොහෝ ලෙස බැඳී පවතිනවා. ප්‍රධාන දිශා 4 වන උතුරු, දකුණ, නැගෙනහිර සහ බටහිර යන දිශා වලට හසුවන පරිදි දොරවල් පිහිටු වීම කළ යුතුය. මෙහිදි එම දිශා වලින් නිවසට ලැබෙන ශක්තීන් පිළිබඳව සැලකීමේදි නිවසක සුබ අසුබ තත්ත්වය තීරණය කර ගත හැකිය.
පංචමහා භූතයන්ගෙන් නිවසට ලැබෙන ශක්තීන් ගැන තීරණය වේ.
උතුර දිශාව – ආපෝ ශක්තිය (ජලය)
දකුණු දිශාව – පඨවි ශක්තිය (පොළොව)
නැගෙනහිර දිශාව – තේජෝ ශක්තිය(ගින්දර)
බටහිර දිශාව – වායෝ ශක්තිය (සුළඟ)
ලෙස හඳුනාගත හැකිය.
නිවසක ඇතුළත් වන සහ පිටවන දොරටු යෙදීම් මෙම දිශාවන් වල ඇති ශක්තීන් පදනම් කරගෙන සුබ අසුබ තීරණය වේ.බොහෝ දෙනෙකු නිවසක ප්‍රධාන දොරටුව පිළිබඳව සැලකිලිමත් වුවද පිටවන දොරවල් පිළිබඳව එතරම් උනන්දුවක් නොදක්වයි.එහෙත් නිවසට ශක්තීන් ලැබීම මෙම සියලුම දොරවල් මගින් සිදුවන බැවින් ඉදිරිපස දොරට මෙන්ම පිටුපස දොරටද විශේෂ තැනක් දියයුතු අතර හැමවිටම පිටවන දොරටු ප්‍රධාන දොරට වඩා අඩු උසකින් සහ පළලකින් යුක්ත විය යුතුය.
නිවසකට ඇතුළු වූ පසු නැවත පිටවීමට ඇති දොරටු ලෙස ප්‍රධාන වශයෙන්ම මළුතැන්ගෙයින් දොරටුවක් යොදා ගන්නා අතරම ඇතැම් නිවාස වල කෑම කාමරයෙන්ද නිවසින් පිටවීම සඳහා දොරටුවක් සැලසුම් කර ගනී.වර්තමනයේ Door Window ලෙස යොදා ගනු ලබන උළුවහු ක්‍රමයද දොරක් ලෙසම සැලකේ.
නිවසක ඇතුළුවීමට හා පිටවීමට දොරටු යෙදීමේදී ප්‍රධාන දොරට අමතරව මළුතැන්ගෙයින් පිටවීමට දොරටුවක් යෙදීම නිවසේ සැලසුම සාර්ථක කිරීමට හේතුවකි. එසේ නොමැති අවස්ථාවල නිවැසියන්ට විවධ රෝගාබාධ වලට ගොදුරුවීමේ අවදානමක් ඇතිවිය හැකිය. මෙම තත්ත්වය නිවසට ඇතුළත් වීමට හා පිටවීමට එක් දොරටුවක් පමණක් ඇත්නම් වඩාත්ම සැලකිලිමත් විය යුතුය.
යම් යම් අවස්ථාවලදි පුද්ගලයන් තමන්ගේ පහසුව උදෙසා එනම්, තමන් ගමන් කරන මාර්ගයට අසල වීම, තමන් ගමන් කරන වාහනය නවතා ඇති ස්ථානයට අසල වීම මත මළුතැන්ගෙයින් ඇති හෝ වෙනත් අනෙකුත් දොරවල් මගින් නිවසින් පිටව යයි. මෙය යහපත් කාරණාවක් නොව තමාගේ අධ්‍යාපනයට රැකියාව සඳහා නිවසින් පිටව යෑමේදී ප්‍රධාන දොරම භාවිතා කිරීම ඉතාම සුදුසුය.
බොහෝ අවස්ථාවලදී නිවස තුළ සෝදාගත් රෙදි වියළා ගැනීමට නිවසින් එළියට ගෙන යෑමෙදීත්, නිවසට අවශ්‍ය මස්, මළු ආදිය නිවස තුළට ගැනීමටත්, මළුතැන්ගෙයින් පිටවන දොරටුව භාවිතා කළද නිවසට ලැබෙන ශක්තීන් මෙම දොරටු හරහා ද නිවසට ලැබෙන නිසාවෙන් මෙම පිටවීමේ දොරටු පිළිබඳව ද අන්වාර්යයෙන්ම අවදානය යොමුකළ යුතුය.
තවද පිටවීමේ දොරටුවද නිවසේ උතුර දකුණ රේඛාව, නැගෙනහිර බටහිර රේඛාව, ඊසාන නිරිත රේඛාව සහ වයඹ ගිණිකොණ යන රේඛාවන් (ගිණිකතිර රේඛාව) කැපී නොයන ස්ථානයන් වල පිහිටා තිබිය යුතු අතරම ප්‍රධාන දොරටුව මෙන්ම පිටවීමේ දොරටුව ඉහළින් යට ලී, බාල්ක, කුරුපා ආදිය නොයෙදෙන ලෙස සැලසුම් කර ගැනීමද ඉතාම වැදගත් වේ.
බොහෝමයක් නිවාස වල ගිණිකොණ දිශාවට මළුතැන්ගෙය පිහිටා ඇති අතර මෙම මුළුතැන්ගෙයි ගිණිකොණ කෝණයට වන්නට පිටවීමට ඇති දොරටුව පිහිටා ඇත. මෙමගින් නිවැසියන්ට රෝග පීඩා ඇතිවේ. ගිණිකොණ කෝණයට වන්නටම දොරටු තැබීම නොකළ යුතුම දෙයක් බව පෙන්වා දිය යුතුය.
නිවසින් පිටවන දොරටුව ඉදිරියෙන්ද ළිඳ, වැසිකිළි වල ආදිය නොපිහිටන ලෙස තිබීම වඩාත් සුදුසුය. මෙම දොරටු සහ නිවසේ ඇති අනෙක් ජනෙල් දොරවල් එක කෙළින් පිහිටා ඒ තුළින් මෙමගින් එහා මෙහා පෙනෙන ලෙසද සැලසුම් නොකර ගත යුතුය.
ප්‍රධාන දිශා 04 ට සුදුසු දිශාවන් මත ගැළපෙන ලෙස නිවසට දොරටු තැබීම් ක්‍රම 16 ක් මත බැඳී පවතී. මෙය ෂෝඩශ ගෘහ වර්ග ලෙස හඳුන්වන අතර මින් 09 ක් සුබ ලෙසත් 07 ක් අසුබ ලෙසත් සැලකේ.
● ධ්‍රැව නිවස (උර්ධ්වමුඛ) – ඉහළින් දොරටුව ඇත. වර්තමානයේ භාවිතයේ නොමැති වුවත් ශුභ ලෙස සැලකේ.
● ධාන්‍ය නිවස – නැගෙනහිර දිශාවට පමණක් දොරටු ඇත. ව්‍යාපාරික ස්ථාන සඳහා සුදුසුය.
● ජය නිවස – දකුණු දිශාවට පමණක් දොරටු ඇත. සුබ නිවසක් ලෙස සැලකේ. නමුත් නිවැසියන්ට උද්‍යෝගය අඩු අලස ගති ඇති වේ.
● නන්ද නිවස -නැගෙනහිරට දකුණට දොරටු ඇත. කාන්තාවන්ට විශේෂයෙන් අශුභය. උෂ්ණ අධික රෝග, කේන්ති යාම ඇතිවන අසුබ නිවසකි.
● ඛර නිවස – බටහිර දිශාවෙන් පමණක් දොරටු පිහිටා ඇත. ධන හානි, අසමගිය ඇතිවන අසුබ නිවසකි.
● කාන්ත නිවස – නැගෙනහිර සහ බටහිර දොරටු ඇති සෞඛ්‍යය ශක්තිය ඇති ආර්ථික වශයෙන් සමඵල නිවසකි.
● මනෝරමා නිවස – බටහිර සහ දකුණට දොරටු පිහිටා ඇති ධනය, දේපළ හිමිවන නිවසකි.
● සුමුඛ නිවස – බටහිර, නැගෙනහිර, දකුණ යන දිශා වලට දොරටු පිහිටා ඇති මෙම නිවස බොහෝමයක් ශක්තින් පිරි ධනය ලැබෙන නිරෝගී අයවලුන් බවට පත්වන සුබ නිවසකි.
● දුර්මුඛ නිවස – උතුරට පමණක් දොරටු පිහිටා අති රෝගී තත්ත්වයන් බහුලව ඇතිවන අසුබ නිවසකි.
● උග්‍ර නිවස – නැගෙනහිර හා උතුරින් දොරටු පිහිටා ඇති ධන හානි වන අසුබ නිවසකි.
● රිපුද නිවස – උතුර සහ දකුණ දිශාවට දොරටු ඇති රෝග පීඩා ඇතිවන සොරුන්ගෙන් විපත් වලට මුහුණ දෙන අසුබ නිවසකි.
● ධනද නිවස – උතුර, දකුණ, නැගෙනහිරට දොරටු ඇති බොහෝමයක් ශක්තීන් ඇති ධන ධාන්‍ය, සම්පත් ලැබෙන ඉතා සුබ දායක නිවසකි.
● නාශ නිවස – උතුරට සහ බටහිරට දොරටු ඇත. ධනය අහිමි වන සෙම් රෝග වලට නිවැසියන් පත් කරන නිවසකි.
● අක්‍රාන්ද නිවස – උතුර, නැගෙනහිර, බටහිරට දොරටු පිහිටන අයථා බැඳීම් ඇති කරවන අසුබ නිවසකි.
● විපුල නිවස – උතුර, දකුණ, බටහිර දොරටු පිහිටා ඇති යස ඉසුරු ලැබෙන සුබදායක නිවසකි.
● විජය නිවස – උතුර, දකුණ, නැගෙනහිර, බටහිර යන 04 දිශාවන්ටම දොරටු ඇති නිවසකි. සුබ වුවත් රාජ රාජ මහාමාත්‍යයන්ට සහ පොදු ස්ථානවලට සුදුසුය.
මෙම සුබ ශක්තීන් නිවසට ලැබීමට නිවසේ ඇති දොරටු නිවසට ඇතුල් වීම් පිටවීම් වශයෙන් නිවැසියන් භාවිතා කළ යුතුය. පිටවීමේ දොරටු දිගු කාලයක් වසා තබා තිබීම නුසුදුසුය.මේ අනුව බලන විට නිවසින් පිටවීමේ දොරටු පිළිබඳ සහ ඒ මගින් නිවැසියන්ටත් නිවසටත් ඇති කරන බලපෑම ඉතා ඉහළ මට්ටමක පවතී.
සියලුම ශක්තීන් තුලනාත්මකව නිවසට ලැබීමටත්, විවිධ රෝග පීඩා වලින් වැළකීමටත්, ධන හානි වලින් මිදීමටත් නිවසක සියලුම දොරටු බලපායි.
මේ නිසා නිවසක ප්‍රධාන දොරටුව මෙන්ම අනෙකුත් පිටවීමේ දොරටු පිළිබඳව ද සැලකිලිමත් විය යුතු අතර පිටවීමේ දොරටු කිසි විටෙකත් අවතක්සේරු නොකළ යුතුය. මන්දයත් පෙර සඳහන් කළ පරිදිම වාස්තු විද්‍යාත්මක සිද්ධාන්ත මේ සඳහා බැඳී පවතින බැවිනි.
වාස්තුවිද්‍යා විශාරද
නිවාස සැලසුම් ශිල්පී
සමස්ත ලංකා ශාස්ත්‍රානුකූල වාස්තු වේදීන්ගේ සංගමයේ
මාධ්‍ය ලේකම්
අරෝෂ ජයවර්ධන
ආලෝකා Homes, මිනුවන්ගොඩ
(Aloka Homes vasthu FB Page)
අර්චිත ඉඳුවර ✍️
