ගෙවුණු වසර 05 ක කාලය පුරාම වසංගත අඩු නැතුව පුරුදු අපිට, නැවතත් වසංගත රැල්ලක සේයාවක් පෙනෙමින් තිබේ.
ලෝක සෞඛ්‍ය සංවිධානය පසුගියදා අනාවරණය කර තිබුණේ ලෝකයේ පැතිර යන නව කොවිඩ් ප්‍රභේදයේ වැඩිම ව්‍යාප්තියක් ආසියානු කලාපයේ දක්නට ලැබෙන බවයි.
විශේෂයෙන්ම සිංගප්පූරුව, හොංකොං, තායිලන්තය සහ ඉන්දියාව යන රටවල් SARS – CoV2 වයිරස් ප්‍රභේදය වැඩි ව්‍යාප්තියක් පෙන්වන ආසියාතික රටවල් ලෙස ලෝක සෞඛ්‍ය සංවිධානය හදුනාගෙන තිබේ.
එය එසේ වුවත් කොළඹ වෛද්‍ය පර්යේෂණ ආයතනයේ වෛරස් රෝග පිළිබඳ විශේෂඥ වෛද්‍යවරයකු පවසන්නේ ශ්‍රී ලාංකික අපි පැතිර යන කොවිඩ් ප්‍රභේදය ගැන අනවශ්‍ය බියක් ඇති කරගත නොයුතු බවයි.
නමුත් ඔහු වැඩිදුරටත් පවසා සිටින්නේ ගර්භනී මව්වරුන්, වැඩිහිටියන්, නිදන්ගත රෝගවලින් පෙළෙන්නන් කොවිඩ් වයිරසය පිටුදැකීමේ සෞඛ්‍ය පුරුදුවලට වහාම යොමු විය යුතු බවයි.
කැස්ස සහ කිවිසුම් යනවිට මුඛය ආවරණය කර ගැනීමේ අවශ්‍යතාවය, ජනතාව වැඩි වැඩියෙන් ගැවසෙන තැන්වලට අනවශ්‍ය ලෙස නොයා පරතරය පවත්වාගෙන යෑම, නිතර දෑත් සබන් යොදා සේදීම, ඇතිවන ස්වසන අපහසුතා ගැන වෙනදාටත් වඩා සැළකිලිමත්වීම වැදගත් බවත් පෙන්වා දෙයි.
එම නිසා වැළඳුනාට පසු පසුතැවීමට වඩා වළක්වා ගැනීම සඳහා මෙවැනි පියවර අනුගමනය කිරීම කෙරෙහි සාමාන්‍ය ජනතාව වශයෙන් අප දැන් සිටම අවධානය යොමු කළ යුතුවේ.
මෙසේ අප කළ යුතුම වන්නේ ගාල්ල ජාතික රෝහලෙ දී මියගිය වයස මාස එකහමාරක බිළිඳකුගේ ජෛව පරීක්ෂාවෙන් පසුව වෛද්‍ය පරීක්ෂණ ආයතනය එම බිළිඳාගේ මරණයට කොවිඩ් වයිරසය හේතු වී ඇති බව අනාවරණය කිරීමත් සමඟයි. ඒ නිසා ක්‍දඩසා නව ප්‍රභේදයේ අවදානම මේ වනවිට අපේ රටට ද පැමිණ තිබේ.
කොවිඩ් යනු සාර්ස් වෛරස් කාණ්ඩයේ වයිරසයක් බැවින් එය කාලෙන් කාලෙට නව ප්‍රභේද බිහි කරමින් ජනතාව අතර පැතිරීමක් දකින්න ලැබෙන හෙයින් කල් තියාම වෛරසයෙන් බේරීම සඳහා සූදානම් වීම තනි තනිව පුද්ගලයන් වශයෙන්ද, රටක් වශයෙන්ද ඉතා වටිනා බව මහා ජානතාවට මතක් කළ යුතුවේ.
